Россия таһымыгар агрошколаларга суолта ууруллан далааһыннаах хамсааһын саҕаланан эрэр. Биһиги онно сөп түбэһэн элбэх үлэни ыытан, сөптөөхтүк дьаһанан, тэринэн иһиэхтээхпит.
Ол курдук Николай Иннокеньевич Кочнев аатынан Хаҥалас орто оскуолата номнуо 6 сыл агрошкола статуһун ылан, үүнэн эрэр көлүөнэни тыа сирин үлэтин-хамнаһын сатабылларыгар сыһыаран үлэлээн кэллэ. Оскуола оҕолоругар ынах сүөһүнү иитиигэ, көрүүгэ-харайыыга, оҕуруот аһын үүннэриигэ үөрэтэбит. Овощеводство уонна животноводство уруоктарыгар оҕолор наадалаах билиилэри ылаллар.
Саҥа сүүрээннэргэ сөп түбэһиннэрэн, сайдар суолу тобулаары «Артыал» СХПКны кытары договорынан үлэлэһэбит. Билиҥҥи туругунан 12 ыанар ынах уонна 11 субай сүөһү кыстыгы туораан эрэллэр. Быйыл 4 доильнай аппараттары ылан туһана сылдьабыт. Ынахпыт үүтүн Байар үүт сыаҕыгар туттарабыт. Сайынын оттуур сирбитигэр өлгөм оту оттоон ынахтарбыт аһылыктарын булабыт. Сайынын сүөһүлэри оскуола “Уһунча” диэн сиригэр баар сайылыкка таһаарабыт. Быйыл күрүөлээһин программатыгар киирсэн, 3 км. күрүө тутуллуохтаах.
Уһунчаҕа хаһыс да сылын үлэлиир — оройуоҥҥа, республикаҕа да бастыҥнар истэригэр киирэр «Сарыал» лаа5ыр базата баар. Кэнники сылларга эбии тутуулар, тупсарыы, саҥардыы үлэтэ барда. Бу лаа5ырга о5олор сайын сүөһү көрөөһүн үөрүйэхтэрин кытары билсэллэр.
Урукку сылларга үгүс үүнүүлээҕинэн биллэр “Ампаардаахха” оҕуруот аһын арааһыттан олордор сыалтан нэһилиэк, оройуон дьаһалтатын кытта үлэлэһэбит. Манна, бастатан туран, күрүөлээһин үлэтэ барыахтаах. Сатаннаҕына, оройуон дьаһалтата көҕүлээһининэн, «Сайын устата мөлүйүөн» диэн оҕуруот аһын үүннэрээһин программата ыытыллыахтаах.
Эбии дохуот киллэрэр сыалтан оҕуруот аһын, сибэккии араас көрүҥүн рассадатын атыыга таһаардыбыт: помидор, перец, оҕурсуу, кабачок, тыква, физалис, петуния, астра, флокс уо.д.а. Олохтоох нэһилиэнньэни рассаданнан хааччыйар былааннаахпыт.
Уустук кэм тирээн турар да буоллар санаабытын түһэрбэккэ үлэбитин былааннаахтык ыытабыт.